pashto-blogger-template-free-download

 

ما ته لۀ جنته کابل ښکلے دے

(فردوس خان صميم او فرهاد خان همت ته ډالۍ)

امجد شهزاد 

/

داسې چې مست مست پۀ ټوله لار يمه

دا چې بې نشې خمار خمار يمه

روح مې پکښې خدائيګو خوبولے دے

ما ته لۀ جنته کابل ښکلے دے

/

هر بازار ئې ځانله ځانله خوند لري

شور لري، مستي لري اؤ ژوند لري

سم پرې چا دَ مينې رنګ شيندلے دے

ما ته لۀ جنته کابل ښکلے دے

/

بيا دَ قرغې يخې هواګانې دي

بيا دَ ماه جبينو اداګانې دي

يو بل ئې پۀ سرو ګُلو ويشتلے دے

ما ته لۀ جنته کابل ښکلے دے

/

هر ښکلے سيالي کړي دَ جهان سره

هر نظر مې زړۀ اوړي دَ ځان سره

هر انداز ئې څومره نازولے دے

ما ته لۀ جنته کابل ښکلے دے

/

دا چې داسې مسته زندګي لري

دا لکه ګلاب چې تازګي لري

ما پۀ خپلو وينو لمبولے دے

ما ته لۀ جنته کابل ښکلے دے

/

دا دَ ښائستوو نازنينو ښار

دا دَ ګُلورينو ماه جبينو ښار

زړۀ پکښې امجد ځکه بائللے دے

ما ته لۀ جنته کابل ښکلے دے

/

٢٤ اپرېل ٢٠١٠ 

قصرِ پاريس کابل، افغانستان